"ဟန်နီဘသက်"
ညိုမှိုင်းအုံ့ဆိုင်းပြီး တလိပ်လိပ်တက်နေသော မိုးသားများ၏ ရွေ့လျားခုန်ပေါက်မှုကား "ဟန်နီ"၏ ရင်တွင်းမှ အပျော်များကို မှီအံ့မထင်မိ။ တိုက်ခတ်နေသော လေနုအေးနှင့် အတူ ပျော်ရွှင်စွာ ခုန်ပေါက်ပြေးလွှား နေရခြင်းအကြောင်းကား သည်နေ့ထုတ်ပြန်သော တက္ကသိုလ်ဝင်တန်း အောင်စာရင်းရှိ "ဟန်နီဘသက်" ဆိုသော အမည်နာမလေး၏ နောက်တွင် "မြန်မာစာ အင်္ဂလိပ်စာ သင်္ချာ ဓာတုဗေဒ ရူပဗေဒ ဇီဝဗေဒ" ဟူသော နောက်တွဲဂုဏ်ပုဒ်ကလေးများက တန်းစီကာ ကပ်လျက်ပါရှိနေခြင်းကြောင့်ဖြစ်သည်။ သည်ရလဒ်ကို "ဟန်နီ" အနေနှင့် လွယ်ကူစွာရရှိခဲ့ခြင်းတော့ မဟုတ်ပေ။ ငယ်စဉ်ကတည်းက အလုပ်များသောဒက်ဒီနှင့် အပျော်မက်သောမာမီတို့၏ မကြာခဏသော ရန်ပွဲများကြားမှ ခဲယဉ်းစွာ ကြိုးစားအားထုတ်ခဲ့ရခြင်းပင်ဖြစ်သည်။ ယခုလို ကြိုးစားမှလည်း မိဘနှစ်ပါး၏ ဂုဏ်ပြုမှုနှင့် နွေးထွေးမှုကို "ဟန်နီ" ရနိုင်မည်ဟုလည်း ယုံကြည်နေမိသည်။သို့နှင့်ပင် အိမ်ထဲသို့ ယုန်ငယ်မလေး တစ်ကောင်အလား ပျော်ရွှင်စွာ ဟစ်အော်ကာ ခုန်ပေါက်ဝင်လာခဲ့တော့သည်။
"ဒက်ဒီရေ ဒက်ဒီ မာမီရေ ဟန်နီ ပြန်လာပြီ"
အိမ်ပေါက်ဝ ရောက်ရောက်ခြင်းပင် အပြေးအလွှား ဆီးကြိုနေသူမှာ ဒက်ဒီရော မာမီပါ တစ်ယောက်မှ မဟုတ်ဘဲ မျက်နှာလေးညှိုးနေသော အိမ်အကူ "မခင်မှုံ" ဖြစ်နေသည်ကို တွေ့လိုက်ရသဖြင့်"ဟန်နီ"အနည်းငယ် စိတ်ကသိကအောက် ဖြစ်သွားရသည်။
"ဒက်ဒီနဲ့မာမီရော မခင်မှုံ"
"ဟို...ဟို"
စကားကိုဆုံးအောင်မပြောဘဲ "တဟိုဟို"နှင့် ဖြစ်နေသော မခင်မှုံကိုကြည့်ကာ "ဟန်နီ" ရင်ထိတ်သွားရသည်။ မခင်မှုံသည် လွန်စွာပင် အကြောက်ကြီးသူဖြစ်ရကား သူမကို ယခုလို ပုံစံနှင့်တွေ့လိုက်ရလျှင် သေချာပေါက်ပင် အိမ်တွင် ပြဿနာတက်နေပြီဟု "ဟန်နီ"ကောက်ချက်ချ လိုက်နိုင်သည်။ ထို့ကြောင့်ပင် အိမ်ထဲသို့ ပြေးဝင်ကာ ဒက်ဒီနှင့်မာမီတို့၏ အိပ်ခန်းရှိရာဆီသို့ ဦးတည်လိုက်မိသည်။ စိုးရွံ့စိတ်ကြောင့် ထွက်လာသော ချွေးစေးတို့ကိုပင် သတိမမူမိဘဲ နှုတ်မှသာ ဆုတောင်းစကားလေးကို တဖွဖွ ရေရွတ်နေမိတော့သည်။
"အိုမြတ်စွာဘုရား ဘာမှဖြစ်မနေပါစေနှင့်"
------------------------
"နင့်ပိုက်ဆံနဲ့ ငါကစားနေတာမဟုတ်ဘူး ငါရှာတဲ့ပိုက်ဆံနဲ့ ကစားနေတာ"
"ဘယ်သူ့ပိုက်ဆံနဲ့ပဲ ကစားကစား နင့်ရဲ့သောက်ကျင့်ကိုက မကောင်းတာ"
"နင်ကတော့ ယောင်္ကျားကောင်းယောင်္ကျားမြတ်ပေါ့လေ တစ်ချိန်လုံး ကေတီဗွီ မာဆတ်က မထွက်တဲ့ကောင်ကများ ငါ့လာပြီးတော့ ပြောနေသေးတယ်"
"ကောင်မ တော်တော်ဂျိုကြွနေတယ် ငါလုပ်လိုက်ရ သေတော့မယ်"
"ထိကြည့်လိုက်စမ်း ငါ့အသားကို နင့်လိုကောင်ကို ထောင်ထဲပို့ပစ်မယ် မသာ"
မိသားစု အိပ်ခန်းတွင်းမှ သမုဒ္ဒရာလေနီကြမ်းကား ပြင်းထန်သထက် ပြင်းထန်လာချေပြီ။ နင်တစ်လုံး ငါတစ်လုံးနှင့် ဖေမောင်စုံစွာ ဆဲရေးတိုင်းထွာပြီး သူ့ထက်ငါ အပြိုင်အဆိုင် ပစ္စည်းပေါက်ခွဲပွဲ ကျင်းပနေသော ဒက်ဒီနှင့် မာမီတို့အနားသို့ "ဟန်နီ"မကပ်ရဲ။ သည်လိုအဖြစ်မျိုးကို အမြဲလိုလို ကြုံတွေ့ရတတ်သော်လည်း ယခုလို သူမအတွက် မင်္ဂလာယူရမည့် အချိန်မျိုးမှာ ကြုံတွေ့ရခြင်းကတော့ အိပ်မက်ဆိုးတစ်ခုလိုပင်။ထို့ကြောင့် အခန်းနံရံကို မှီကာ "ဟန်နီ" အသံတိတ်ငိုနေမိတော့သည်။
"ဒုန်း"
ပြင်းထန်ကြမ်းတမ်းသော အခန်းတံခါး ပိတ်လိုက်သံနှင့်အတူ ဒက်ဒီတစ်ယောက် ဒေါကြီးမောကြီးနှင့် Luggage ဆွဲကာ အခန်းအပြင်သို့ထွက်လာပြီး အောက်ထပ်သို့ ဆင်းသွားသည့်တိုင်အောင် ငိုကြွေးနေသော "ဟန်နီ့"ကို မြင်မသွားပေ။ မေမေကလည်း အခန်းတံခါးကို ပိတ်ကာ lock ချလိုက်ပြီမို့ သည်နေ့တွင် "ဟန်နီ"၏ အောင်မြင်မှုကို မျှဝေခံစားပေးမည့်သူ တစ်စုံတစ်ယောက်မျှ မရှိတော့။ ထိုစဉ် "ဟန်နီ"၏ ပခုံးကို ကြင်နာယုယစွာ ထွေးပွေ့လာသော လက်တစ်စုံကို လှည့်ကြည့်လိုက်တော့ မျက်ရည်များကြားမှ ပြုံးပြနေသော မခင်မှုံကို တွေ့လိုက်ရတော့သည်။ "ဟန်နီ" လည်း မခင်မှုံ၏ လက်ကိုအသာအယာ ဖယ်ခွာချကာ အောက်ထပ်သို့ လေးကန်သော ခြေလှမ်းများဖြင့် ဆင်းသွားလိုက်တော့သည်။
---------------------
"ဒေါင်းတော့မယ်နော်...သက်ကတော့ ထွေပိတ်နေပြီ ကြည့်သာပစ် တုတ်အိမ် ငှဲငှဲ"
"အမယ်လေး မိသက်ရယ် ဒီည ညည်းဖဲကိုက ကောင်းနိုင်လွန်းတာပါအေ"
"ဟုတ်ပ သူပဲဒေါင်း ပိုက်ဆံဖဲလဲ သူပဲများ ဟွန်း မိန်းမနော်"
စားပွဲပေါ်တွင် အပုံလိုက်ဖြစ်နေသော ငွေစက္ကူထပ်များနှင့် စားသောက်ဖွယ်ရာများကို ကြည့်ရင်းပင် "ဟန်နီ" စိတ်ညစ်လာသည်။ ဒက်ဒီကို ဟိုတယ်မှ သွားခေါ်ပြီး မိသားစုလိုက် ရှော့ပင်ထွက်ရန် တောင်းဆိုဖို့ မျှော်လင့်ချက်ဖြင့် ဤအခန်းထဲသို့ လာခဲ့သော်လည်း မေမေက သူမ၏ ဖဲချပ်များဖြင့်သာ ပျော်မွေ့နေလေသည်။ သို့နှင့် "ဟန်နီ"လည်း မဝံ့မရဲနှင့်ပင် မာမီ့အနားသို့ တိုးကပ်သွားမိလေသည်။
"မာမီ ဟန်နီ ပြောစရာရှိလို့"
"ပြောလေ သမီးလေးရဲ့ ဘာလဲမုန့်ဖိုးလိုချင်လို့လား ပေးမှာပေါ့"
မာမီက "ဟန်နီ့"ကို စကားသာပြောနေသည်။ သူမ၏ မျက်လုံးများက "ဟန်နီ့"ဆီ တစ်ချက်ကလေးပင် ရောက်မလာခဲ့။
"မဟုတ်ပါဘူး မာမီ ဒက်ဒီကိုသွားခေါ်ပြီး အပြင်ထွက်ရအောင် ပြောမလို့ပါ"
"မာမီ မအားဘူး ဟန်နီ သမီးဒက်ဒီကို ခေါ်ချင်ရင် မောင်ကျော့်ကို ဟိုတယ်ကို လိုက်ပို့ခိုင်းလိုက် ရော့ လမ်းမှာ သုံးဖို့မုန့်ဖိုး"
မာမီက ထိုကဲ့သို့ပြတ်သားစွာ ပြောဆိုပြီးသကာလ တစ်သောင်းတန် ဘဏ်အုပ်နှစ်အုပ်ကို "ဟန်နီ့" လက်ထဲ ထည့်ပေးလိုက်သဖြင့် "ဟန်နီ" မျှော်လင့်ချက်မဲ့သွားသလိုပင် ခံစားလိုက်ရတော့သည်။ မာမီ့ကို ထပ်ပြောဖို့ ကြိုးစားလိုက်စဉ်ပင် မာမီ့အသံက စီကနဲ ထွက်လာတော့သည်
"ကဲ ဒေါင်းပြီဟေ့ လာထားကြမယ် မောင်ကျော်ရေ ဟန်နီ့ကို ဆီဒိုးနားကို လိုက်ပို့ပေးလိုက်"
မာမီ၏ ဝါသနာကို "ဟန်နီ"၏ မေတ္တာတရားက အနိုင်မယူ နိုင်သည့်အဆုံးတွင် "ဟန်နီ"လည်း စလင်းဘတ်အိတ်ကို ဆွဲယူကာ အိမ်ရှေ့သို့ထွက်လာခဲ့တော့သည်။
-------------------------
ပူပြင်းလှသော ရန်ကုန်မြို့ပြ၏ ရာသီဥတုကို အံတုရင်း ကားထဲတွင် အဲကွန်းကို အေးစက်နေအောင်ဖွင့်ထားပြီး "ဟန်နီ" တစ်ယောက် သီချင်းလေးဖွင့်ကာ နားထောင်နေမိသည်။ တစ်ကယ်တော့ "ဟန်နီ" ပျော်နေသည် မဟုတ်ပေ။ ရင်ထဲမှ လှိုက်တက်လာသော ဝမ်းနည်းခြင်းတို့ကို မျိုသိပ်ရင်း ဒက်ဒီထံတွင်တော့ ကြည်နူးချမ်းမြေ့မှု ရလိုရငြား မျှော်လင့်နေမိခြင်းပင်ဖြစ်ပေသည်။
နေကပူ ကားကကြပ်နှင့်မို့ "ဟန်နီ"တစ်ယောက် စိတ်ညစ်ညူး နေမိစဉ် နွေပူပူ လမ်းမထက်က စံပါယ်ပန်းကုံးလေးများ ကိုင်ကာ လွယ်အိတ်အနွမ်းကလေးဖြင့် လိုက်လံ ရောင်းချနေသော ကလေးငယ်တစ်ဦးကို တွေ့လိုက်ရသဖြင့် သူမ၏ဘဝပေးနှင့် နှိုင်းစာကာ ကရုဏာသက်လှသည်ဖြစ်၍ ကားမှန်ချကာ လှမ်းခေါ်၍ ဝယ်လိုက်သည်။ သူ၏ဘဝ အကြောင်းလေးကို သိလိုစိတ်ဖြင့် မေးမည်အပြုတွင် သူမတို့၏ ကားဘေးသို့ ယှဉ်ရပ်လာသော ကားတစ်စီးပေါ်မှ ဒက်ဒီနှင့်"ဟန်နီ"မသိသော အမျိုးသမီးတစ်ဦးတို့၏ အနမ်းများကို မထင်မှတ်ဘဲ တွေ့လိုက်ရသည်မို့ ရှက်စိတ်တို့က်ု ထိန်းမရပြီဖြစ်ရကား ကားမှန်ကို အလျင်စလို ဆွဲတင်လိုက်မိတော့သည်။
"ဦးမောင်ကျော် ၁၅ လမ်းကိုမောင်း"
"ဘာဖြစ်လို့လဲ ဟန်နီ ဆီဒိုးနားကို မသွားတော့ဘူးလား"
"ဟင့်အင်း ဟန်နီ မောင်းခိုင်းတဲ့နေရာကိုသာမောင်းပါ"
"ဟန်နီ့" စိတ်ဓာတ်တို့ ထွက်ပေါက်ပိတ်ကုန်ပြီမို့ သူမအပေါ် နားလည်ကြင်နာစွာဂရုစိုက်တတ်သော "ကိုကြီးဖြိုးထက်"၏ တိုက်ခန်းသို့သာ သွားလိုမိသည်။ ငွေသာရှိ၍ အခြားသော အရာအတော်များများ ဆုံးရှုံးနေရသော သူမအဖို့ သာယာကြည်နူး ဂရုစိုက်မှုကို ဘယ်သူ့ဆီကပဲရရ လိုချင်တောင့်တ နေမိသည်ကတော့ အမှန်တရားပင် ဖြစ်ပေတော့သည်။
------------------------
"ရော့ ကိုလာအေးအေးလေး သောက်လိုက်ဦး ဟန်နီ"
သူမ၏ရှေ့သို့ ရှည်မျောမျော ဖန်ခွက်လှလှလေးဖြင့် ကိုလာထည့်ကာ ဂရုတစိုက်တိုက်နေသော ကိုကြီးဖြိုးထက် ကိုကြည့်ကာ "ဟန်နီ" ငိုချင်လာမိသည်။ သည်လို ကြင်နာမှုမျိုးကို သူစိမ်းတစ်ယောက်ထံမှ ရနေသည်ထက် သူမ၏မိဘများထံမှ ရရှိလျှင် မည်မျှပြည့်စုံပျော်ရွှင်ဖွယ် ကောင်းလိမ့်မည်နည်းဟုလည်း တွေးထင်နေမိတော့သည်။
"ဟန်နီ ဘာလို့ငိုနေတာလဲဟင် မငိုပါနဲ့ တိတ်ပါကွာ ဟန်နီ ငိုတာကိုယ်မကြည့်ရက်ဘူး"
ပြောလည်းပြော တစ်သျှူးစလေးနှင့် မျက်ရည်များ သုတ်ပေးနေသော ကိုကြီးဖြိုးထက်ကို မိမိအပေါ် ချစ်ခွင့်ပန်ထားသော သူစိမ်းယောင်္ကျားလေး တစ်ယောက်အနေနှင့်ပင် မငြင်းဆန်မိ။ သည်လို ကြင်နာမှုမျိုး သူတစ်ယောက်တည်းထံမှ "ဟန်နီ" ရရှိနိုင်၍ဖြစ်သည်။
"ဟန်နီ သေချင်တယ်"
"မပြောကောင်းမဆိုကောင်း ဟန်နီရယ် ဟန်နီလေး စိတ်ညစ်စရာရှိရင် ကိုကြီးဆီလာပေါ့ ကိုကြီးက ဟန်နီလေးကို ပျော်အောင်ထားပေးမှာပေါ့"
"ဟန်နီ့ဘဝမှာ ဟန်နီရဲ့ခံစားချက်ကို နားလည်တာ ကိုကြီး တစ်ယောက်ပဲရှိတယ်"
"ဟန်နီ"၏ တသိမ့်သိမ့်တုန်ခါနေသော ခန္ဓာကိုယ်လေးကို ကိုကြီးဖြိုးထက်က ကြင်နာစွာပွေ့ဖက်လိုက်သည့်တိုင် "ဟန်နီ" မရုန်းကန်မိ။ ရင်ခွင်တစ်ခု၏ အနွေးဓာတ်ကို အတုလား အစစ်လားပင် "ဟန်နီ" ခွဲခြားမနေလိုတော့။ "ဟန်နီ့"ဘဝက အလွန်ပင် အေးစက်လွန်းနေသဖြင့် ပြင်းထန်စွာ နာကျင်ခံစား နေရ၍ပင်ဖြစ်တော့သည်။ ထိုနေ့မှစ၍ ကိုကြီးဖြိုးထက်သည် "ဟန်နီ"၏ တီးတိုးဖော်ဖြစ်လာခဲ့တော့သည်။
-----------------------
ပါးပြင်နုနုလေးပေါ်မှ ညင်သာလှစွာသော အထိအတွေ့ကြောင့် "ဟန်နီ" အိပ်ယာမှ နိုးထလာခဲ့သည်။ မျက်လုံးနှစ်လုံး ဖွင့်လိုက်ချိန်တွင် နေ့သစ်တစ်နေ့၏ ပထမဆုံး မြင်ကွင်းအနေနှင့် သွားပွတ်တံနှင့် တာဝါကိုကိုင်ကာ အသင့်စောင့်နေသော ကိုကြီးကိုတွေ့လိုက်ရသဖြင့် ကြည်နူးစွာနှင့်ပင် ရေချိုးပစ္စည်းများကိုယူကာ ရေချိုးခန်းထဲသို့ ဝင်လိုက်တော့ ကိုကြီးက အပြင်မှ စိတ်မချသလို လှမ်းပြောလေသည်။
"ဟန်နီ မြန်မြန်လုပ်နော် အအေးပတ်မယ် ပြီးရင် ကော်ဖီသောက်ရအောင် ကိုကြီးအဆင်သင့်လုပ်ထားမယ် အိမ်လဲပြန်ရဦးမယ်"
"ဟန်နီ"လည်း အင်းပါဟု ပြောပြီးရေချိုးခန်းထဲဝင်ကာ ရေပန်းကို ဖွင့်လိုက်သည်။ သူမနှင့်ကိုကြီးကို ပတ်ဝန်းကျင်က မေးငေါ့နေကြသော်လည်း "ဟန်နီ" ဂရုမစိုက်။ သူမတို့နှစ်ဦး ကျိန်းသေလက်ထပ်ပါမည်ဟုလည်း တွေးမထားဘဲ ဆေးတက္ကသိုလ် ပထမနှစ်မှစ၍ ယခုလိုပင် living together နေလာခဲ့ခြင်းဖြစ်သည်။ ဘာကိုမှ အလကားမရသော လောကကြီးတွင် ကိုကြီးထံမှ အကြင်နာ ဂရုစိုက်မှုတို့ အတွက် "ဟန်နီ"ဘက်ကလည်း သူ့ဆန္ဒကို ပြန်လညါဖြည့်ဆည်းပေးရလေသည်။ အတွေးနယ်လွန် နေသည်မှာ မည်မျှပင်ကြာသွားသည်မသိ။ ချမ်းစိမ့်စိမ့် ဖြစ်လာတော့မှ ရေပန်းကိုပိတ်ကာ အခန်းအပြင်သို့ ထွက်လာခဲ့တော့သည်။
ကိုကြီးဖျော်တိုက်သော ကော်ဖီကိုသောက်ရင်း "ဟန်နီ" စာအုပ်တွေကို စစ်နေတော့ ကိုကြီးက "ဟန်နီ့" ပါးလေးကို ဖွဖွလေးလိမ်ဆွဲလိုက်သည်။
"ကိုယ်တို့ လက်ထပ်ရအောင် ဟန်နီ"
ကိုကြီးထံမှ သည်လိုစကားမျိုး တစ်နေ့ကြားလာရမည်ကို "ဟန်နီ" ခံစားသိနှင့်နေသည်မို့ မထူးဆန်းတော့ပေ။ ထို့ကြောင့်လည်း ပေါ့ပေါ့ပါးပါးပင် တုန့်ပြန်လိုက်တော့သည်။
"ဟန်နီ လက်မထပ်ချင်သေးဘူး ကိုကြီး ဒီတိုင်းလဲနေလို့ ရနေတာပဲ ကဲပါ အခုအိမ်ပြန်မယ် ခက်ခက်တို့အိမ်ကို လိုက်ပို့"
ထိုအခါမှ ကိုကြီးက မတင်မကျ မျက်နှာထားနှင့် "ဟန်နီ့"ကို ပြန်လိုက်ပို့ရန် ကားသော့ကို ယူလိုက်လေတော့သည်။
--------------------------
"မိဘကို လှိမ့်ပြီးအလေလိုက်ရတာ တော်တော်လေးမှ ပျော်ခဲ့ရဲ့လား ဒေါ်ဟန်နီဘသက်"
ဧည့်ခန်းကိုအဖြတ် စူးကနဲထွက်လာသော မာမီ့အသံကြောင့် "ဟန်နီ"ခြေလှမ်းတို့က ဦးတည်ရာ ပြောင်းကာ ဧည့်ခန်းထဲသို့ သွားလိုက်တော့သည်။ ဒေါသထွက်နေသော ဒက်ဒီနှင့် မာမီတို့၏ မျက်နှာထားများကို မြင်လိုက်ရပြီမို့ သူမညက ခက်ခက်၏အိမ်တွင် မအိပ်ခဲ့သည်ကို သိနေကြပြီဟု တွက်ဆလိုက်မိသည်။
"ညက နင်ဘယ်တွေသွားနေတာလဲ ဟန်နီ ငါ့ကို မှန်မှန်ပြော မညာနဲ့ ငါနင့်အကြောင်းတွေ အားလုံးစုံစမ်းပြီးပြီ"
သိနေကြပြီကိုး။ "ဟန်နီ" နှုတ်ခမ်းတစ်ချက်တွန့်လိုက်မိသည်။
"ဒက်ဒီ သိနေရင်လဲ ဘာလို့ ဟန်နီ့ကို မေးနေသေးလဲ"
"ဟင်...ဒါဆိုငါတို့ကြားတာတွေက အမှန်တွေပေါ့ နင် ကောင်လေးတစ်ယောက်နဲ့ living together နေနေတယ် ဆိုတာအမှန်တွေပေါ့ ဟုတ်လား ဟန်နီ"
ဒက်ဒီ၏အမေးကို "ဟန်နီ"မဖြေမိ။ အံကိုသာ တင်းတင်း ကိုက်ထားမိသည်။ သို့သော် မျက်ရည်များက အဆက်မပြတ် ကျဆင်းနေပေသည်။
"နင် မိုက်လုံးကြီးလှချည်လား မိဟန်နီ ဘာလို့ဒီလို လုပ်ရတာလဲ"
"ဟန်နီ"၏ ပခုံးကို ကြမ်းတမ်းစွာ ကိုင်လှုပ်၍ မေးနေသော ဒက်ဒီ့ကို မျက်ရည်များကြားမှပင် တစ်လုံးချင်း ပြန်ဖြေလိုက်သည်။
"လောကမှာ ဘယ်အရာမှ အလကားမရဘူးလို့ ဒက်ဒီတို့ပဲ ပြောခဲ့ကြတာလေ ဟန်နီလဲ သူ့ဆီက လိုချင်တာရှိလို့ သူလိုချင်တာကို ပြန်ပေးလိုက်ရတာပါ"
"နင့်ကို ဒီလောက်ပြည့်စုံအောင်ထားတာ နင်က ဘာတွေလိုအပ်နေသေးလို့လဲ ဟန်နီ"
"ဟန်နီ" ဧည့်ခန်းမှန်မှတစ်ဆင့် အိမ်ပြင်ဘက်သို့ ရီဝေစွာ ငေးစိုက်ကြည့်လိုက်သည်။
"သူက မနက်ဆို ဟန်နီ့ကို အနမ်းလေးတွေနဲ့နှိုးတယ် ပြီးရင် ကော်ဖီဖျော်တိုက်တယ် ကျောင်းလိုက်ပို့တယ် ဟန်နီ စားချင်တာတွေ လိုက်ဝယ်ကျွေးတယ် ဟန်နီ သွားချင်တဲ့ နေရာတွေကို မမောတမ်းလိုက်ပို့ပေးတယ် ဟန်နီ လိုချင်တာ ဒီလိုအကြင်နာတွေပါ ဒါပေမယ့် သူ့ဆီကမဟုတ်ဘူး ရနေလို့သာ အစားထိုးပြီး သာယာနေမိတာ"
"ဒါဆို နင်က အဲဒီအကြင်နာတွေကို ဘယ်သူ့ဆီက လိုချင်တာလဲ ဟန်နီ"
"ဒက်ဒီနဲ့မာမီ့ဆီက"
"ဟန်နီ"၏ တိုးညင်းသောစကားအဆုံးတွင် ဒက်ဒီရော မာမီပါ ငြိမ်ကျသွားတော့သည်။ ဧည့်ခန်းလေးကား တိတ်ဆိတ်မှု အပြည့်။ မိသားစုဝင်အားလုံး ခေါင်းငိုက်စိုက်ချလျက်။ တစ်ယောက်၏ ကွက်လပ်ကို တစ်ယောက်ကဖြည့်မပေးခဲ့မိ၍ မလိုလားအပ်သော ရလဒ်များထွက်လာခဲ့ရသည်။ အဲကွန်း၏ အအေးဓာတ်ကလည်း သူတို့၏ အပူကို မငြိမ်းသတ် နိုင်စွမ်းတော့ပေ။ ထိုခဏတွင်ပင် "ဦးဘစော"က ပြတ်သားသော ဆုံးဖြတ်ချက်ကို ထပြောလိုက်တော့သည်။
"ငါတို့မိသားစု ပျော်ပျော်ရွှင်ရွှင် နွေးနွေးထွေးထွေး နေကြရအောင်"
--------------------------
လှပသောပန်းပွင့်များအကြား ငြိမ်သက်သိမ်မွေ့စွာ အိပ်ပျော်နေသော "ဟန်နီ"ကို ကြည့်ရင်း "ဒေါ်သက်ထားမင်း" တစ်ယောက် အူလှိုက်သည်းလှိုက် ငိုကြွေးနေသည်။ "ဦးဘစော"ကလည်း အံကို တင်းတင်းကြိတ်ကာ နံရံကို ခဏခဏပုတ်နေမိသည်။
"နောက်ဘဝဖြစ်လေရာတိုင်းမှာ ဒက်ဒီတို့လို မိဘဝတ္တရား မကျေပြွန်တဲ့ လူတွေရဲ့သားသမီးအဖြစ် မမွေးဖွားလာပါစေနဲ့ သမီးလေးရယ်"
"သမီးလေး ဟန်နီလေး မာမီအမိုက်မကြီးကို ထကြည့်ပါဦး"
သည်းထန်စွာငိုကြွေးနေကြသော မိဘနှစ်ပါးကို ကရုဏာ သက်စွာဖြင့် အသုဘရှုလာသူများက ချော့မော့နှစ်သိမ့် ပေးနေကြသည်။ ထိုအထဲမှ စပ်စုတတ်ပုံရသော အမျိုးသမီးတစ်ဦးက အနီးရှိအခြားအမျိုးသမီးတစ်ဦးကို မေးလိုက်လေသည်။
"ကလေးက ဘယ်လိုဖြစ်ပြီးဆုံးသွားတာလဲ"
"သူ့ကောင်လေးနဲ့ ချိန်းတွေ့ရင်း ကောင်လေးက အဓ္ဓမကြံစည်လို့ ရုန်းကန်ထွက်ပြေးရင်း လှေကားပေါ်က ပြုတ်ကျတာတဲ့ ၁၅လမ်းဘက်က တိုက်အဟောင်းတွေ ဆိုတော့ လှေကားတွေက တဖြောင့်တည်း မတ်မတ်ကြီးတွေလေ"
မေးသူကို ဖြေသူကလည်း တိကျစွာပြန်ဖြေနေသည်။ ထိုအခါမှပင် မေးမြန်းသူအမျိုးသမီးက သနားကရုဏာ သက်စွာ ကျွတ်တစချက်သပ်၍ သက်ပြင်းချကာ ပြောလိုက်သည်ကား
"အဖြစ်ဆိုးလိုက်တာ ကလေးရယ် နောင်ဖြစ်လေရာ ဘဝတိုင်းမှာ လူသူတော်ကောင်းများနဲ့သာ ဆုံဆည်းခွင့် ရပါစေကွယ်"
------------********-------------
Monsoon(မွန်စွန်း)
အဟောင်းလေးကို ထပ်လောင်းသစ်လွင်ထားပါသည်။
Post a Comment