သဘာဝကိုလွန်‌၍ သရဲ

"သဘာဝကို_လွန်ဆန်၍" (စ/ဆုံး)

++++++++++++++++++++++++++++++++++

အဲ့ဒီနေ့ကပေါ့…။
သူ့ကိုကျွန်မပြန်တွေ့ခဲ့တယ်။

သူ ဆိုတာ ကျွန်မအရမ်းချစ်ခဲ့ရတဲ့ ကျွန်မရဲ့ ချစ်သူပေါ့…။

သူနဲ့ကျွန်မ ဝေးသွားခဲ့တာ တစ်နှစ်နီးပါးလောက်ရှိပြီ။ဖေဖေက သ
သူနဲ့ သဘောမတူလို့ ကျွန်မကို သူနဲ့ဝေးရာ ပြည်ပကို ပညာတော်သင်စေလွှတ်ခဲ့တယ်…။

ကျွန်မသူနဲ့ခိုးရာလိုက်ဖို့အထိ ကြံစည်ခဲ့ပါတယ်။ဒါပေမယ့်မအောင်မြင်ခဲ့ပါဘူး။သူကလည်းခွင့်မပြုဘူးလေ။ကျွန်မဘဝ နစ်မွန်းသွားမှာကို သူမလိုလားဘူးတဲ့။

ဒီလိုနဲ့ ကျွန်မပြည်ပကို မသွားချင်ပဲ သွားခဲ့ရတယ်။

ဒါပေမယ့် ကံကောင်းတယ်ပဲပြောရမလား ကံဆိုးတယ်ပဲပြောရမလား…ကျွန်မပြည်ပကိုထွက်သွားပြီး ၆လအကြာမှာ ကျွန်မဖေဖေဆုံးပါးသွားခဲ့တယ်။

ဖေဖေဆုံးသွားလို့ ဝမ်းနည်းနေတဲ့ ကျွန်မရဲ့ မျက်ရည်စတွေထဲမှာ သူနဲ့ ပြန်တွေ့ရတော့မယ်ဆိုတဲ့ ပျော်ရွှင်မှုတချို့ ရောနှောနေလေရဲ့……။

ဖေဖေဆုံးသွားပြီးနောက်ပိုင်း
သူရှိရာ မြန်မာပြည်ကို ကျွန်မ ပြန်လာခဲ့ပါတော့တယ်။ကျွန်မတို့နှစ်ယောက်ပြန်လည်ဆုံစည်းရတော့မှာမို့ အပျော်တွေတပွေ့တပိုက်ကြီးနဲ့ပေါ့။

ဒါပေမယ့် အဲ့ဒီအပျော်တွေက သိပ်ကြာကြာမခံခဲ့ပါဘူး။မြန်မာပြည်ပြန်ရောက်ရောက်ချင်း ကျွန်မကြားလိုက်ရတဲ့ သတင်းက ကျွန်မရင်ဝကို ဆောင့်ကန်လိုက်သလိုပဲ…ကျွန်မအမောတွေဆို့ခဲ့ရပါတော့တယ်……။

သူ အိမ်ထောင်ကျသွားပြီတဲ့……………။

ကျွန်မရဲ့ မျှော်လင့်ချက်တွေကို ချိုးဖဲ့ဖျက်ဆီးခံလိုက်ရပြီလေ။သူကျွန်မအပေါ်သစ္စာမရှိခဲ့ဘူး။

ဒါပေမယ့် ကျွန်မသူ့အပေါ်မှာထားတဲ့ အချစ်တွေကမကုန်နိုင်သေးတော့ ခက်ပြီပေါ့။

ကျွန်မသူတစ်ပါး အိမ်ထောင်ရေးကို ဖျက်ဆီးချင်တဲ့စိတ် တပြားမှမရှိခဲ့ပါဘူး။
ဒါကြောင့် သူ့အပေါ်မှာ မကုန်နိုင်သေးတဲ့ ကျွန်မရဲ့ မေတ္တာတွေကို ၁၅၀၀ ကနေ ၅၂၈ သို့လျော့ချခဲ့ပါတော့တယ်။

ကျွန်မသူ့ကို သူငယ်ချင်းတစ်ယောက်လိုပဲ ခင်သွားတော့မယ်လို့ဆုံးဖြတ်လိုက်တယ်လေ……။

ကျွန်မ facebook သုံးရင်း facebook ပေါ်မှာသူနဲ့ပြန်တွေ့တော့ သူက "သွင်ခန့်ညား"ဆိုတဲ့ ကလောင်နာမည်နဲ့ နာမည်ရစ စာရေးဆရာတစ်ယောက်တောင်ဖြစ်နေပြီလေ။
ကျွန်မသူ့အတွက်အရမ်းဝမ်းသာတာပဲ။

ဒါနဲ့ကျွန်မသူ့ကို သူငယ်ချင်းတယောက်အနေနဲ့chat box ထဲမှာသွားနှုတ်ဆက်ခဲ့ပါတယ်။

- hi

- hi pr

- ဟဲ့ နင်အရမ်းကို အောင်မြင်နေပါလား…ငါကျောင်းတုန်းက နင့်ကိုအဲ့လောက်တော်လိမ့်မယ်လို့မထင်ခဲ့မိဘူးဟ…နင်အရမ်းတော်တယ်သူငယ်ချင်း………

- ဟုတ်ကဲ့ အားပေးတဲ့အတွက်ကျေးဇူးတင်ပါတယ်…ဒါနဲ့friက ကျွန်တော့်ကိုသိလို့လား…

သူ့ဆီကပြန်လာတဲ့ reply တခုက ကျွန်မစေတနာတွေ မေတ္တာတွေကိုစော်ကားလိုက်သလိုပဲ။ဒါပေမယ့် ကျွန်မက profile picture မတင်ထားလို့ သူမမှတ်မိတာနေမှာပါလို့ဖြေသိမ့်လိုက်ပြီး…

- အေးပေါ့ဟာ နင်က နာမည်ကြီးနေပြီဆိုတော့ ငါ့ကို ဘယ်မှတ်မိပါတော့မလဲ…

- မဟုတ်ပါဘူးဟ ငါတကယ်နင့်ကိုမသိတာ…နင်က ငါတို့မေဂျာကပဲလား

- အေးလေ Physics မေဂျာကပဲလေ
ငါ့နာမည် "ခက်ဆစ်ချို"

- "ခက်ဆစ်ချို" ဟုတ်လား ငါ့သူငယ်ချင်းတွေထဲမှာ အဲ့နာမည်နဲ့မရှိဘူးဟ

ကျွန်မဒေါသထွက်ပြီလေ။သူကျွန်မကို စနေတာလား တကယ်မမှတ်မိတာလားတော့မသိဘူး။ဒါပေမယ့် မိန်းကလေးတယောက်အနေနဲ့ အဲ့လို အချိုးမျိုး ချိုးခံလိုက်ရတော့ ဒေါသအရမ်းထွက်သွားတယ်…ရှက်လဲရှက်မိတယ်…။

- ဘာလဲနင်က ဘဝင်မြင့်တာလား ငါတို့ ဘွဲ့အတူတူယူခဲ့တာလေဟာ…

- ဘာ…ဘယ်လို ဘွဲ့အတူတူယူတယ် ဟုတ်လား ငါက ခုထိ ဘွဲ့မရသေးဘူးဟ…ခုမှ ဒုတိယနှစ်

အို……ဘယ်လိုပါလိမ့်။သူနဲ့ကျွန်မနဲ့ ဘွဲ့အတူတူယူခဲ့တာကိုတောင်သူက ဗြောင်လိမ်နေသေးတယ်။သူ့ဘဝထဲကနေ ကျွန်မကို တကယ်ပဲ အပြီးအပိုင်ဆွဲထုတ်လိုက်ပြီလား။ကျွန်မနဲ့ ပတ်သက်သမျှ အမှတ်တရတွေအကုန် သူ့မှတ်ဥာဏ်ထဲမှာ မရှိတော့ပြီလား။

သူ့မှတ်ဥာဏ်ထဲမှာ ကျွန်မမရှိတော့ပေမယ့် ကျွန်မမှတ်ဥာဏ်ထဲမှာသူရှိနေသေးတယ်လေ…ဒါကြောင့်…ကျွန်မဒေါသတွေကိုမျိုသိပ်ပြီး သူ့ကို ဆက်မေးလိုက်တယ်…

- နင့်တို့လင်မယား အဆင်ပြေကြရဲ့လား

- အမ်! ပေါက်ကရတွေ…ဘယ်ကလင်မယားလဲ ငါ့မှာ မိန်းမ မပြောနဲ့ စော်တောင်မှ ခုမှပူပူနွေးနွေးပြတ်ထားတာဟ

ဘယ်လို??? သူကျွန်မကို လိမ်နေတာလား…ဒါမှမဟုတ်သူတကယ်ပဲ ဆက်မင်းနောင် မဟုတ်ဘူးလား…

- ဟင်! နင်…နင် ဆက်မင်းနောင် မဟုတ်ဘူးလား

-နင်လူမှားနေတာပဲ
ငါ ဆက်မင်းနောင် မဟုတ်ဘူးဟ…ငါ့နာမည် သွင်ခန့်ညား

ဟင်!သူက သွင်ခန့်ညားတဲ့။ကျွန်မက သွင်ခန့်ညားဆိုတာ သူ့ကလောင်နာမည်ထင်နေတာ။ အံ့သြဖို့အရမ်းကောင်းတာက ကျွန်မရဲ့ တချိန်ကချစ်သူ ဆက်မင်းနောင် နဲ့သူနဲ့ ရုပ်ချင်းချွတ်စွပ်တူနေတာပဲ။

- ငါမယုံဘူးဟာ နင် လိမ်နေတာပဲဖြစ်ရမယ် ငါနင့်ဆီအခုဖုန်းခေါ်မယ် နင်ကိုင်မလား

-ခေါ်လေ ရပါတယ် ဒါငါ့ဖုန်း 09…………………

သူပေးတဲ့ဖုန်းနံပါတ်ကိုကျွန်မကြည့်လိုက်တော့ ဆက်မင်းနောင် ရဲ့ဖုန်းနံပါတ်မဟုတ်ပါဘူး။ဖုန်းဆင်းကတ်တွေ ပေါနေတဲ့ခေတ်ကြီးမှာ သူဖုန်းနံပါတ်ပြောင်းသွားတာလဲ ဖြစ်နိုင်တာပဲလေ။ဘာပဲဖြစ်ဖြစ် ဖုန်းဆက်ကြည့်ရင်တော့ ပိုသေချာတယ်။ဒါကြောင့် သူ့ဖုန်းနံပါတ်ကို ကျွန်မခေါ်လိုက်တယ်…

"တူ………………တူ……………"

"ဟဲလို…"

"ဟဲ့ ဆက်မင်းနောင်…ငါပါ ခက်ဆစ်ချို လေ…"

"ဟင်! အသံ……"

ကျွန်မအသံကြားတော့ သူလန့်သွားတယ်…။

"ဟဲ့…ဘာဖြစ်တာလဲဟ…ငါပါ… နင်ပဲဖုန်းနံပါတ်ပေးပီးတော့"

"အော် အေး…အေး…သိပြီ"

ဒါပေမယ့်သူနဲ့ဖုန်းစပြောပြောခြင်းပဲ ကျွန်မ ကွဲကွဲပြားပြားသိသွားခဲ့ပါပြီ။သူဟာ တချိန်က ကျွန်မချစ်သူ ဆက်မင်းနောင် မဟုတ်ဘူးဆိုတာကိုပေါ့။ဘာကြောင့်လဲဆိုတော့……ဖုန်းထဲက သူ့အသံက ဆက်မင်းနောင် မဟုတ်ကြောင်းသက်သေပြနေတယ်လေ။

ဒါပေမယ့် ဘာ့ကြောင့်ရယ်တော့မသိဘူး။ကျွန်မသူနဲ့ စကားဆက်ပြောချင်နေမိတယ်။

"ဟို…ဟိုလေ ဆောရီးနော် ငါလူမှားသွားလို့"

"ရပါတယ်…ဒါနဲ့နင်လူမှားတဲ့တယောက်က ငါနဲ့တော်တော်တူလို့လားဟင်"

"တူတယ်ဟ ချွတ်စွတ်ပဲ…အသံပဲမတူတာ…"

"ဟုတ်လား ဒါဆို လွန်ခဲ့တဲ့ ၆ လလောက်ကစပြီး ငါအမြဲလိုလို မက်တတ်တဲ့အိပ်မက်နဲ့ သက်ဆိုင်နေမလားပဲ"

"ဟင်…ဟုတ်လား……… ဘာအိပ်မက်လဲ ငါ့ကိုပြောပြလို့ရမလား"

အရမ်းကိုစပ်စုတတ်တဲ့ ကျွန်မအကျင့်ကြောင့် သူပြောပြောမပြောပြော ကျွန်မမေးပြီလေ…။

"အင်း…ရပါတယ်…ငါလဲ အဲ့ဒီထူးဆန်းတဲ့ အိပ်မက် ကို အမြဲလိုလို မက်နေတော့ အလွတ်တောင်ရနေပြီ"

"ဟုတ်လား…ဘယ်လိုလဲဟင် ပြောပြပါလား"

"ဒီလိုဟ……

ငါ့အိပ်မက်ထဲမှာ ငါကကောင်မလေးတယောက်နဲ့တွဲနေတာ…အဲ့ဒီကောင်မလေးနဲ့ ငါနဲ့အရမ်းချစ်ကြတာတဲ့…ဒါပေမယ့် အဲ့ကောင်မလေးနဲ့ ငါ့ကို သူ့မိဘက သဘောမတူဘူး…ပြီးတော့ ငါကလည်း အိမ်ကအတင်းပေးစားတဲ့လူနဲ့ လက်ထပ်လိုက်ရတယ်တဲ့…အဲ့ကောင်မလေး ကတော့ ဘယ်ရောက်သွားလဲမသိဘူး…

အိပ်မက်ဆိုတော့ အစီအစဉ်မကျဘူးဟ…ဗြောက်သောက်ပဲ…ဒါပေမယ့် အိပ်မက် မက်တိုင်း အဲ့ဒီအကြောင်းအမြဲလိုလို မက်နေတာဆိုတော့သာမန်အိပ်မက်တော့ မဟုတ်ဘူးထင်တာပဲ"

အို……သူပြောပြတဲ့ သူ့ရဲ့ အိပ်မက်က ကျွန်မတို့ချစ်သူ နှစ်ဦးရဲ့ အဖြစ်အပျက်နဲ့တိုက်ဆိုင်နေပါလား…။

"အဲ့ အိပ်မက်ထဲက ကောင်မလေးကိုရောနင်အပြင်မှာလိုက်မရှာဘူးလား"

"ဟင့်အင်း မရှာပါဘူး…ဘာလို့လဲဆိုတော့ ငါမှသူ့မျက်နှာကိုမမှတ်မိတာဟ…အိပ်မက်ထဲမှာ မှတ်မိပေမယ့် နိုးလာရင် မမှတ်မိတော့ဘူး…ဒါပေမယ့် ငါမှတ်မိတာတခုတော့ရှိတယ်ဟ"

"ဟုတ်လား ဘာကိုမှတ်မိတာလဲ…"

ကျွန်မတို့နှစ်ယောက်ရဲ့ အဖြစ်အပျက်နဲ့တိုက်ဆိုင်နေတာကြောင့် သိချင်ဇောနဲ့ ကျွန်မမေးလိုက်မိတယ်။

"အသံ………သူ့ရဲ့အသံပဲ"

"အသံဟုတ်လား…???နင်သူ့အသံကိုမှတ်မိရုံနဲ့ ဘယ်လိုလုပ်လိုက်ရှာလို့ရမလဲဟ"

"အေး…အသံကြားရုံနဲ့တော့ရှာလို့မရဘူး ဒါပေမယ့်………"

"ဒါပေမယ့် ဘာဖြစ်လဲ"

"အသံကြားရင်တော့ ငါမှတ်မိတယ်"

"အသံကြားရင်မှတ်မိတယ် ဟုတ်လား"

"အေးဟုတ်တယ်…အရမ်းအံ့သြဖို့ကောင်းတာတခုက အဲ့ကောင်မလေးရဲ့ အသံက………… နင့်အသံနဲ့ တူနေတာပဲ…"

ဘယ်လို…။ကျွန်မရင်တွေ အရမ်းခုန်သွားတယ်။။သူ့အိပ်မက်ထဲက ကောင်မလေးအသံက ကျွန်မအသံနဲ့တူတယ်တဲ့…။သူအဲ့လိုပြောလိုက်ရုံနဲ့ကျွန်မဘာလို့ရင်တွေ အဲ့လောက်ခုန်သွားရတာလဲကျွန်မကိုယ်ကျွန်မ မစဉ်းစားတတ်တော့ဘူး။

"တကယ်ပြောတာ ငါမလိမ်ဘူး…နင့်ငါ့ဆီဖုန်းစဆက်တော့လေ…
"ဟဲ့ ဆက်မင်းနောင်…ငါပါ ခက်ဆစ်ချိုလေ…" ဆိုတဲ့အသံကို ငါကြားကြားချင်း ငါအရမ်းအံ့သြသွားတာဟ"

"အော် ဒါကြောင့် ငါဖုန်းဆက်တုန်းက "ဟင်! အသံ" ဆိုပြီး နင် အလန့်တကြားဖြစ်သွားတာကိုး"

"အင်းဟုတ်တယ်…ဒါဆိုငါမက်နေတဲ့ အိပ်မက်ထဲက ငါ့ချစ်သူက…နင်များလား ခက်ဆစ်ချို"

သူအဲ့လိုမေးလိုက်တော့ ကျွန်မ စိတ်ထဲ မှာလေ လေဟာနယ်ထဲကို ရောက်သွားသလိုပဲ…ဟာတာတာကြီးနဲ့။ဘယ်လိုခံစားမှုမှန်းကိုမသိတာ။

ဒါပေမယ့် ကျွန်မသိနေတာ တခုတော့ရှိတယ်။အဲ့ဒါက ………ကျွန်မသူ့ကို …။

"နင့်ကိုငါတခုပြောပြမယ်ဟာ…ငါပြောပြတာကို ခဏလောက်နားထောင်ပေး"

"ပြောလေ ခက်ဆစ်ချို"

"နင်မက်နေတဲ့ အိပ်မက်ထဲက အဖြစ်အပျက်ဟာ အပြင်မှာတကယ်ဖြစ်ခဲ့တယ်ဆို နင်ဘာပြောမလဲ"

"ဘာ…ဘယ်လို…နင်ဘာပြောလိုက်တယ်"

"ဟုတ်တယ်…အဲ့ဒီအဖြစ်အပျက်ဟာ ငါနဲ့ငါ့ချစ်သူရဲ့ အဖြစ်အပျက်ပဲ…အားလုံးတထပ်ထဲ တူညီနေတယ်…ခုတော့နင့်အိပ်မက်ထဲကအတိုင်း သူလည်းအိမ်ထောင်ကျသွားပြီ"

"ဟင်! ဒါ…ဒါဆို နင့်ချစ်သူက ငါနဲ့တူတဲ့ လူလား"

"အင်း…ဟုတ်တယ်…"

"ဒါဆိုသူ့ရဲ့ အဖြစ်အပျက်က ဘာလို့ ငါ့အိပ်မက်မှာ လာပေါ်နေတာလဲဟ…ငါနဲ့သူနဲ့လဲ ဘာမှမပတ်သက်ပဲနဲ့"

"အင်း…ငါလဲမပြောတတ်တော့ဘူး…ငါကတော့ သဘာဝလွန်ဖြစ်ရပ်တခုလို့ပဲ သတ်မှတ်ချင်တယ် သွင်ခန့်ညား"

"ဘယ်လို……သဘာဝလွန် ဟုတ်လား"

"ဟုတ်တယ်လေ သဘာဝအတိုင်းမဟုတ်ပဲ သဘာဝကိုဆန့်ကျင်နေရင်တော့ သဘာဝလွန်ပဲပေါ့…"

ဖုန်းထဲက သွင်ခန့်ညားရဲ့ အသံ ခဏတိတ်သွားတယ်။ပြီးမှ………

"ဘာပဲဖြစ်ဖြစ်ဟာ …………ငါ့အိပ်မက်ထဲက အသံပိုင်ရှင်ကိုငါတွေ့ချင်နေခဲ့တာကြာပြီ…အခုမှပဲတွေ့ရတော့တယ်ဟာ…ပြီးတော့
ငါတစ်ခုပြောမယ် ခက်ဆစ်ချို…"

"အင်း…ပြောလေ"

"ငါ…အဲ့ဒီအသံပိုင်ရှင်ကို စွဲလန်းနေမိပြီ………"

"………………………"

ဟင်!!!! သွင်ခန့်ညားရဲ့ရည်ရွယ်ချက်ရှိရှိ စကားတခွန်းကြောင့် ကျွန်မနှလုံးခုန်သံတို့ ခေတ္တရပ်တန့်သွားသလို ခံစားလိုက်ရသည်။

"တကယ်ပါ ငါလေ…အိပ်မက်ထဲကအသံပိုင်ရှင်ကိုတွေ့ခဲ့ရင်…ငါ့ရဲ့အချစ်တွေအားလုံးသူ့ကိုပဲ ပုံပေးပစ်မယ်လို့ ဆုံးဖြတ်ထားပြီးသား…အခုနင်က အသံပိုင်ရှင်လည်း ဟုတ်တယ်…ငါ့အိပ်မက်ဇာတ်လမ်းထဲက မင်းသမီးလေးကလည်း နင်ကိုယ်တိုင်ပဲ ဆိုတော့……"

"အဲ့တော့ ဘာဖြစ်လဲ"

"အဲ့တော့ ငါ……ငါ…နင့်ကို…ချစ်ပါရစေ…ခက်ဆစ်ချို"

"ရှင်!! "

သွင်ခန့်ညားက ကျွန်မကို ချစ်တယ်တဲ့။

လောကကြီးက ကျွန်မအတွက် ဆက်မင်းနောင် နောက်တဦးကို ဖန်ဆင်းပေးခဲ့ပြန်ပါပြီ။

ကျွန်မချစ်သူ ဆက်မင်းနောင်ရဲ့ ကျွန်မအပေါ်ထားရှိတဲ့အချစ်စိတ်တွေ ကိန်းဝပ်နေတဲ့ သွင်ခန့်ညားကို ကျွန်မ လက်မခံနိုင်စရာ အကြောင်းမရှိပါဘူး…

ကျွန်မပါးပေါ်ကိုမျက်ရည်တွေအလိုလိုလိမ့်ဆင်းကျလာတယ်……ဝမ်းနည်းတာလား ဝမ်းသာတာလား ကျွန်မမဝေခွဲတတ်ဘူး။

အဲ့ဒီလိုပဲ ကျွန်မသူု့ကို ဆက်မင်းနောင်ရဲ့ နေရာမှာ အစားထိုးခဲ့တာလား ……
ဆက်မင်းနောင်နဲ့ ရုပ်ချင်းဆင်ပြီး ဆက်မင်းနောင်နဲ့စိတ်ချင်းဆက်နေလို့ ချစ်မိတာလားဆိုတာလည်း မသိပြန်ဘူး။

သြော် ဖူးစာရယ်…ဆုံမှဆုံတတ်လိုက်တာ သဘာဝကို လွန်ဆန်ပြီးတော့ကို ဆုံတွေ့စေခဲ့တဲ့ ကံကြမ္မာကိုလည်း ကျွန်မကျေးဇူးတင်မိတယ်။

ကျွန်မဘဝမှာ ဆက်မင်းနောင်နဲ့ မဆုံဆည်းခဲ့ရပေမယ့် ဆက်မင်းနောင်နဲ့ ထပ်တူ ကျွန်မကိုချစ်ပေးမယ့် ချစ်သူတယောက်ရလိုက်တဲ့ အတွက် အရမ်းကို ပျော်မိတယ်…

ငါလည်းနင့်ကိုချစ်ပါတယ်…သွင်ခန့်ညား ရယ်…။

"ခက်ဆစ်ချို…နင်ငါ့ကို လက်ခံမှာလားဟင် !!! …"

ကျွန်မတစ်ယောက်ထဲ အတွေးနယ်ချဲ့နေမိတာ သွင်ခန့်ညား အသံကြားမှ သတိပြန်ဝင်လာတယ်။

"ဟဲလို…ခက်ဆစ်ချို…နင်ငါ့ကို လက်ခံပေးမယ့်မို့လားဟင်…"

ကျွန်မပြန်မဖြေဖြစ်ခဲ့ပါဘူး။ဆိတ်ဆိတ်နေခြင်းဟာလည်း ဝန်ခံခြင်း တမျိုးပဲ မဟုတ်ပါလားရှင်…။

* * * * * * * * * *
ဒီလိုနဲ့ မောင် နဲ့ ကျွန်မ ချစ်သူတွေဖြစ်ခဲ့ကြတယ်။
ချစ်သူသက်တမ်းအတွင်းမှာတော့ ဆက်မင်းနောင်နဲ့မတူညီတဲ့ အချက်တခုကို ကျွန်မသူ့ဆီမှာ တွေ့ခဲ့ရပါတယ်။

ဘာလဲဆိုတော့ သူနဲ့ကျွန်မ ချစ်သူသက်တမ်းအတွင်းမှာတခါမှ ရန်မဖြစ်ခဲ့တာပါပဲ။မောင် က ကျွန်မအပေါ်အရမ်းကို အလျော့ပေးပါတယ်။အရာရာ ကျွန်မစိတ်တိုင်းကျပါပဲ။

အဲ့ဒီလောက်ထိပျော်ရွှင်မှုအတိနဲ့ သာယာနေတဲ့ ကျွန်မတို့နှစ်ယောက်ရဲ့အချစ်ရေးဟာ မုန်တိုင်းမလာခင် ရောက်လာတဲ့ လေပြေလေညင်းတခုလို့သာ ကျွန်မကြိုသိခဲ့မယ်ဆိုရင်…………

* * * * * * * * * *
အဲ့ဒီနေ့ကပေါ့ ……… မောင်နဲ့ မောင့်မိဘတွေ လူကြီးစုံရာနဲ့မိသားဖသားပီပီ ကျွန်မကို လာတောင်းရမ်းကြတယ်။

ကျွန်မ မေမေ့ကိုအသိမပေးထားပေမယ့် မေမေက အလိုက်အထိုက်ဧည့်ခံပါတယ်။

ဒါပေမယ့် မောင် နဲ့ မောင့်မိဘတွေရဲ့အလုပ်အကိုင်ကို မေမေသိသွားတဲ့အခါမှာတော့…

"မေမေ လုံးဝသဘောမတူဘူးသမီး…သမီးအခု သူနဲ့ အဆက်ဖြတ်လိုက်ပါ"

"ဘာဖြစ်လို့လဲ မေမေ…သူ့မှာ ဘာအပြစ်ပြောစရာရှိလို့လဲ"

"ဒီမှာသမီး စာရေးဆရာတစ်ယောက်က သမီးကို မေမေတို့ထားသလို တင့်တောင်းတင့်တယ်ထားနိုင်မယ်ထင်လို့လား…အလကား…ငါ့သမီးထမင်းနပ်မှန်စားရရင်တောင်ကံကောင်း"

"အဲ့လိုလည်းမဟုတ်သေးဘူးလေမေမေရဲ့…"

ကျွန်မစကားမဆုံးသေးခင် မောင့်မေမေက ထပြောသည်။

"ဒီမှာရှင့် …ရှင်တို့ဘယ်လောက်ချမ်းသာနေလဲတော့ ကျွန်မမသိဘူး…ကျွန်မတို့က ဝန်ထမ်းတွေဆိုပေမယ့် ဒီသားတစ်ယောက်နဲ့ ဒီချွေးမလောက်ကတော့ အေးအေးဆေးဆေး တင်ကျွေးထားနိုင်ပါတယ်…ပြီးတော့ကျွန်မသားက ရိုးရိုးသားသား စာရေးဆရာ လုပ်စားနေတာ…သူခိုးဓားပြလဲ မဟုတ်ဘူး ဒါကိုရှင်က ဘာလို့ ဒီလောက်ဆပ်ဆပ်ထိမခံဖြစ်နေရတာလဲ…ပြောပါဦး"

"အမလေးအရပ်ကတို့ရေ ကြားလို့မှကောင်းကြသေးရဲ့လား အိမ်ပေါ်ကို ခွေးတက်ဟောင်နေတယ်တော့…"

မေမေ့ရဲ့ စကားကြောင့် မောင့် မိဘတွေ တော်တော်ဒေါသထွက်သွားကြတယ်။မောင့် ဖေဖေကလည်း

"ဒီမှာ… ခင်ဗျားလူကြီးလူကောင်းဆိုရင် ယဉ်ယဉ်ကျေးကျေးပြောပါ"

"အမလေး ရှင်တို့လို လူတွေကို ယဉ်ယဉ်ကျးကျေးပြောနေစရာ အကြောင်းကိုမရှိတာ…ရှင်တို့ကိုလည်း ဘယ်သူမှဖိတ်ထားတာမဟုတ်ဘူး…ကျွန်မအိမ်ပေါ်တက်ပြီးကျွန်မကို လာမစော်ကားနဲ့…ပိုင်နက်ကျူးလွန်မှုနဲ့ တရားစွဲလိုက်မယ် သဘောပေါက်လား"

အခြေအနေက တဖြည်းဖြည်းတင်းမာသည်ထက်တင်းမာလာသည်။မောင့်မျက်နှာကို လှမ်းကြည့်တော့ မေမေ့ကို တော်တော်ဒေါသထွက်နေပုံရသည်။

"ဒီမှာ ကျွန်မကလည်းရှင့်လို ယဉ်ကျေးမှုမရှိ ငွေဂုဏ်မောက်နေတဲ့လူရဲ့သမီးမျိုးနဲ့ သေတောင်မပေးစားဘူး…ကျွန်မသားကို ရှင့်သမီးထက် သာတဲ့လူနဲ့ပေးစားပြမယ် စောင့်ကြည့်လိုက်"

မောင့်မေမေ ထို့သို့ပြောပြီးနောက် မောင်တို့အားလုံးထွက်သွားကြသည်။

"အမလေး ခွေးပါးစပ်က နတ်စကားထွက်လို့ ရာရာစစအေ"

"ကဲတော်ပါတော့ မေမေရယ်…သမီးတောင်းပန်ပါတယ်"

"အခုမှ လာတောင်းပန်မနေနဲ့ ညည်းကြောင့် ငါအခုလို အိမ်ပေါ်တက်ပြီးအစော်ကားခံရတာ…အဲ့ဒါညည်းသိလား"

မေမေကထိုသို့ပြောပြီး အိမ်ပေါ်ထပ်သို့တက်သွားသည်။

ရက်စက်လိုက်တာ ကံကြမ္မာရယ်…ကျွန်မကိုမှ အငြိုးထားပြီးကံဆိုးစေခဲ့တာလား………။

* * * * * * * * * *
အဲ့ဒီပြဿနာတွေဖြစ်ပြီး တစ်လလောက်အကြာမှာပဲ မောင် လက်ထပ်တော့မယ်ဆိုတဲ့ သတင်းကိုကြားလိုက်ရတယ်။

မောင် ကျွန်မကို မုန်းတီးသွားပြီထင်တယ်။ကျွန်မဆီကိုလည်းအဆက်အသွယ်မလုပ်တော့ဘူး။

ချို့ ကို တစ်ယောက်ထဲထားခဲ့တော့မှာလား မောင် ရယ်…………

ချို့ ကိုရှင်းပြခွင့်ပေးပါမောင်…

ကျွန်မ မောင့် facebook timeline ထဲဝင်ကြည့်လိုက်တော့ မောင့် လက်ထပ်ဖိတ်စာလေးတင်ထားတာကိုတွေ့လိုက်ရတယ်။

မောင်သွင်ခန့်ညား(Second years Physics) နှင့် မနေညိုရိပ် (Shwe Myanmar-Myanmar Traditional Dressing co.,ltd )

မောင့်မေမေ က သူပြောခဲ့သလိုပဲ မောင့်ကို ကျွန်မထက်သာတဲ့ မိန်းကလေးနဲ့ရအောင်ပေးစားခဲ့ပါတယ်။မိဘတွေရဲ့ အတ္တလောင်းရိပ်ကြောင့် ကျွန်မတို့နှစ်ယောက်ရဲ့ အချစ်ပန်းလေး နွမ်းကြွေခဲ့ရတော့တယ်။

တကယ်တော့ ကျွန်မကိုကအချစ်ကံခေခဲ့တာပါ။

"ဖောက်!…"

chat box က noti တက်လာသံကြားလို့ကျွန်မကြည့်လိုက်တော့ မောင့်ဆီက ဖြစ်နေတယ်။

မောင်ကျွန်မကိုပြန်ဆက်သွယ်ပြီလေ။ကျွန်မပျော်လိုက်တာ…။မောင် ကျွန်မကို ဘာပြောထားပါလိမ့်? ကျွန်မချက်ချင်းပဲ chat box ထဲဝင်ကြည့်လိုက်တယ်။

- ငါ့ရဲ့ မင်္ဂလာပွဲကို ဆက်ဆက်လာစေချင်တယ် ခက်ဆစ်ချို……

မောင်ကသူ့မင်္ဂလာပွဲကိုလာခဲ့ဖို့ကျွန်မကို တောင်းဆိုထားတဲ့ message ဖြစ်နေတယ်။

ကျွန်မ ဘာလုပ်ရမလဲ?မောင့်ဆန္ဒကိုမောင်နဲ့မသက်ဆိုင်တော့တဲ့ အချိန်ထိ ကျွန်မဖြည့်ဆည်းပေးချင်တယ်…

ဒါပေမယ့် ကျွန်မ သွားသင့်သလားပြန်စဉ်းစားတယ်။
…
…
…

နောက်ဆုံးတော့ ကျွန်မဆုံးဖြတ်ချက်တခုကို မျက်စိစုံမှိတ်ပြီး ချလိုက်ပါတော့တယ်။

ကျွန်မမောင့်မင်္ဂလာပွဲကို တက်မယ်…

* * * * * * * * * *
ခက်ဆစ်ချိုကို ကျွန်တော့်မင်္ဂလာပွဲတက်ဖို့ တောင်းဆိုခဲ့တာ ကျွန်တော်မှားလား မှန်လား မခွဲခြားတတ်ဘူး။

ဒါပေမယ့်ကျွန်တော့်ဘဝ အချုပ်အနှောင်ထဲမရောက်ခင်လေးမှာ ကျွန်တော်သူ့ကို တွေ့ချင်တဲ့စိတ်က ကြီးစိုးနေတယ်လေ။

ချို ကတော့ ကျွန်တော်သူ့ကို ချိုးချင်လို့ ကျွန်တော့်မင်္ဂလာပွဲကို တက်ခိုင်းတယ်လို့ထင်သွားလားတော့မသိဘူး။

မင်္ဂလာပွဲစကတည်းက ကျွန်တော်သူ့ကိုဧည့်သည်တွေကြားထဲမှာ လိုက်ရှာနေခဲ့တာ ခုချိန်ထိပဲ။သူမလာတော့ဘူးထင်တယ်။

ဒါပေမယ့် ကျွန်တော့်စိတ်ထဲမှာ အလိုလိုသိနေတယ်။သူကျွန်တော့်ဆီကို မဖြစ်ဖြစ်တဲ့ နည်းနဲ့ အရောက်လာလိမ့်မယ်။

* * * * * * * * * *
"ဟင်! ခက်ဆစ်ချို"

ဧည့်သည်တွေကို လိုက်လံဧည့်ခံနေရင်းက ကျွန်တော်သူ့ကိုတွေ့လိုက်ရတယ်။
ကျွန်တော်ထင်ထားတဲ့ အတိုင်းပဲ သူကျွန်တော့်မင်္ဂလာပွဲကို လာခဲ့ပါတယ်။

သူ့မျက်နှာက ပြုံးနေပေမယ့် သူ့မျက်ဝန်းက မျက်ရည်စတွေကိုတော့ သူထိန်းချုပ်နိုင်စွမ်းမရှိပါဘူး။

ချို ထိုင်နေတဲ့ဝိုင်းကို သွားဖို့အတွက် ကျွန်တော်ခြေလှမ်းပြင်လိုက်စဉ်မှာပဲ ကျွန်တော့်ဘောင်းဘီအိတ်ကပ်ထဲမှာထည့်ထားတဲ့ ဖုန်းက vibrate တုန်လာတယ်။

ဖုန်းကိုထုတ်ကြည့်လိုက်တော့ message တစ်စောင်ရောက်နေတယ်။

"ဟင်! ချို့ဆီကပဲ…"

သူထိုင်နေတဲ့ဝိုင်းကို မလာဖို့ စာလှမ်းပို့တာထင်တယ်…ကျွန်တော်တွေးမိတွေးရာတွေးလိုက်ပြီး message ဝင်ဖတ်လိုက်တယ်…

_ မောင်…ချို လေ မောင့်မင်္ဂလာပွဲကို မရောက်ရောက်အောင်လာခဲ့မယ်သိလား…ချိုအရမ်းချစ်ရတဲ့ မောင့်ရဲ့ဆန္ဒကို ချိုနဲ့မသက်ဆိုင်တော့တဲ့အချိန်ထိ ချို ဖြည့်ဆည်းပေးချင်လို့ပါ…ဒါပေမယ့် ချိုအခုအသက်ရှူလို့မဝတော့ဘူး မောင်ရယ်…………
ချိုသေရတော့မယ်ထင်တယ်မောင်……
ဒါပေမယ့်ချိုမကြောက်ပါဘူး……ချို တစ်ခုပဲ တောင်းဆိုပါရစေ…ချိုသေသွားခဲ့ရင်လေ မောင့်အနားမှာ ဝိဥာဉ်အဖြစ်နဲ့ ချို့ ကိုနေခွင့်ပြုပါနော်……မောင့်ကိုချစ်………………………………………

တပိုင်းတစ message ကို ဖတ်ပြီးတဲ့ အခါမှာတော့ ချိုထိုင်နေတဲ့ ဝိုင်းကို ကျွန်တော်လှမ်းကြည့်လိုက်တယ်။

"ဟာ!! "

ခုနက ဝိုင်းမှာ ချိုမရှိတော့ဘူး…
ကျွန်တော်မျက်စိအမြင်မှားခဲ့တာလား…မဟုတ်ဘူး…ကျွန်တော်သေချာမြင်လိုက်တာပါ…

ဟင်! ဒါဆို ချို…ချို…အခု…………

ကျွန်တော် ဘာကိုမှဂရုမစိုက်တော့ပါဘူး…အားလုံးကို လျစ်လျူရှုပြီး မင်္ဂလာပွဲကနေကျွန်တော် ပြေးထွက်လာခဲ့ပါတော့တယ်…။

"ဟယ်…သတို့သား ထွက်ပြေးသွားပြီဟေ့"

"ဟဲ့ဟဲ့ လုပ်ကြပါဦး သတို့သားရူးသွားပြီထင်တယ်"

တယောက်တပေါက်အော်ဟစ်သံတို့က တဖြည်းဖြည်း ကျွန်တော့်နောက်မှာကျန်ရစ်ခဲ့ပြီးနောက်မှာတော့…

* * * * * * * * * *
(…………)မီးပွိုင့်။
လူတွေအများကြီး ဝိုင်းအုံနေကြသည်။
ရဲတွေရော။ယာဉ်ထိန်းတွေရော။ အများကြီးပဲ။

လူအုပ်ကြီးထဲကို ကျွန်တော်တိုးဝင်လိုက်တော့ ကားသုံးစီးဆင့်တိုက်ထားသည့် မြင်ကွင်းက မြင်ရက်စရာတောင်မရှိ။

အလယ်ကကားမှာ စိစိညက်ညက်ကျေနေသည်။

ကားအနားကို ကျွန်တော်သွားဖို့လုပ်တော့ ရဲတွေက ကျွန်တော့်ကို ဝိုင်းဆွဲထားကြတယ်။
ကျွန်တော့်ကိုသွားခွင့်မပြုကြဘူး။

တအောင့်လောက်ကြာတော့ ကားထဲက လူတွေကို ဆွဲထုတ်ကြပြီး လူနာတင်ယာဉ်ပေါ်ကို တင်ကြတယ်။အလယ်ကကားထဲက ကောင်မလေးတစ်ယောက်ကို ဆွဲထုတ်လိုက်တဲ့အခါမှာတော့ တော်တော်လေးကို ရုပ်ပျက်ဆင်းပျက်ဖြစ်နေပြီ။

ဒါပေမယ့် အဲ့ဒီ ကောင်မလေးရဲ့ လက်ထဲမှာ ဖုန်းတလုံးနဲ့ ဓါတ်ပုံတပုံကို ကျစ်ကျစ်ပါအောင် ဆုပ်ကိုင်ထားတာ ကျွန်တော်တွေ့လိုက်ရတယ်။

ဟင်!ဒါ ချို့ဖုန်းပဲ…ဒါဆို ဒါ…ချို………ချို ဖြစ်မယ်ထင်တယ်………

"ချိုရယ် …မောင့်ကို အဲ့လောက်တောင် ချစ်သတဲ့လား "

နေပူရှိန်ပြင်းပြင်းအောက်မှာ ရုတ်ချည်းဆိုသလိုပဲ မိုးတွေရွာချလာတယ်။ကျွန်တော့်မျက်ရည်တွေ နဲ့ မိုးရေစက်တွေ ရောထွေးကုန်ကြတယ်…ပြီးတော့ ကျွန်တော့်နားထဲမှာ စကားသံ တချို့ကို ပြန်ကြားယောင်လာတယ်………

" ငါ့အိပ်မက်ထဲမှာ ငါကကောင်မလေးတယောက်နဲ့တွဲနေတာ…အဲ့ဒီကောင်မလေးနဲ့ ငါနဲ့အရမ်းချစ်ကြတာတဲ့…ဒါပေမယ့် အဲ့ကောင်မလေးနဲ့ ငါ့ကို သူ့မိဘက သဘောမတူဘူး…ပြီးတော့ ငါကလည်း အိမ်ကအတင်းပေးစားတဲ့လူနဲ့ လက်ထပ်လိုက်ရတယ်တဲ့…အဲ့ကောင်မလေး ကတော့ ဘယ်ရောက်သွားလဲမသိဘူး…"

ကျွန်တော် ချို့ကိုပြောပြခဲ့တဲ့ ကျွန်တော့်ရဲ့ အိပ်မက်…။
ကျွန်တော် သိလိုက်ပါပြီ…
နောက်ဆုံးတော့ ကျွန်တော်သိလိုက်ရပြီ…
…………
…………………
တကယ်တော့……… ကျွန်တော်မက်ခဲ့တဲ့ အဲ့ဒီ သဘာဝလွန်အိပ်မက်က ချိုပြောခဲ့သလို ဆက်မင်းနောင်နဲ့ခက်ဆစ်ချိုတို့ရဲ့ အဖြစ်အပျက်မှ မဟုတ်ခဲ့တာ…………………………။

+++++++++++++++++++++++++++++++++

ဆက်မင်းနောင်(ရူပ) ရေးသားသည်။